You are here: home > Vetso

FANADINOANA? - Teboka Telo

Azo vakiana?

Ekeko fa misy ny fanadinoana
foronin'ny saina;
saingy toa tsapako ho sarotra inoana
raha toa ka ny aina:
ila sy tapaka, sombin'ny nofo
no nisy naninda!
Ny holatr'apetrany, ireo no porofon'
ny zava-tsinimba.

Ekeko fa misy ireo taon-dasa
tsy tsaroan'ny fo:
asa natomboka, zava-kinasa,
faniriana tsy to, ...
Saingy, ireny, mazàna, tsy hoe volom-borona
misedra tadio;
Fa vato mifototra mafy sy miorina
Ka tadidio!

Ekeko fa misy reo minia mikipy,
manao ranomody;
miaritra mafy ny fery voakikin'
ny tsiny sy tody, ...
Fahanana voamanadino sahady
'lay fo mitadidy! ...
Asesi-bato, toa zaran'angady
hanefa tsy fidy!