Iza loatra (Tsiky dia ampy)

Nantsain'i
(Nalaina tao amin'ny vetso.serasera.org)
Iza loatra moa ianao
R'ilay mpandalo takariva
No toa tsy hitahita akory
Dia nigadona avy tany
Iza loatra moa ianao
No nangalatra ny antsiva
Ka nanaitra izany tory
Nofenoiko nofy mamy?

Iza loatra moa ianao
Ry voninkazo hafa loko
Fa vao eny ambavahady
Dia nampiontana ny aiko?
Iza loatra moa ianao
No sahy mibahana ny foko
Miseho ho tompony sahady
Mivatravatra sy mibaiko?

Iza loatra moa ianao
No sahy mandrombaka ny saiko
Ary mampikambana azy
Amin'ny fisainanao?
Iza loatra moa ianao
No miambo ho lalaiko
Ka misarika ny tanako
Mba hanafosafo anao?
-----

Iza loatra moa ianao
No hoe manarina ny toetrako
Mitady izay mba tsara ho ahy?
Iza loatra moa ianao
No mahavatra miova fomba
Hifanahaka amin'ny ahy?

Iza loatra moa ianao
No miseho malala-tanana
Manolotra ahy izay iriako?
Iza loatra moa ianao
No mifohifohy volo
Mitady ho ahy izay mba tiako?

Iza loatra moa ianao
No dia faly manome
Mihoatra izay mba notadiaviko?
Iza loatra moa ianao
No indro fa mirehareha
Ho ilay olona tiaviko

Iza loatra moa ianao
Fa mbola tsy itsikiako akory
Nefa dia mitsiky amiko?
Iza loatra moa ianao
No mandany ranomaso
Raha mahita ny tomaniko?

Iza loatra moa ianao
Ny tsy manahy ho lany andro
Mieritreritra ny ho aviko?
Iza loatra moa ianao
No tratry ny hasarotam-piaro
Raha misy olona tiaviko?

Iza loatra moa ianao,
Iza loatra mba lazao,
Olon-tia sa fahavalo?
Iza loatra moa ianao
Iza loatra mba lazao
Famonjena sa Dahalo?

TdA
--------
Rohy:
Sokajy : Ahiahy
2922 0
Hevitra mandeha
rfanjav ( 20/10/2003 08:50)
Fa mba iza loatra no anontanianao?
Mety ho tena fitiavana izany ny azy e!
DadaRabe ( 29/07/2007 12:20)
Resy lahatra aho ry Hery ! HAy ve i Hery mpiangaly an'ity rahraha ity é! sady manidina ambony mihitsy an !
Ento miakatra é !
DdRb
ikalamako ( 30/07/2007 08:29)
dia gaga koa aho ry DdRb, hay ve tato nisy an'izao e!(izaho koa aloha tara foana eto amin'ity sehatra ity e.)
Aza dia ela figadona loatra miandry valim-panontaniana anefa eo amin'ny fiainana fa indraindray ny anjara sy ny vintana migadona amin'ny ora tsy ampoizina, mila "otazana" amin'iny fotoana iny, ka alao hery e !!!
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0152