Tiako ianao na dia (2) (Tsiky dia ampy)

Tiako ianao na dia
Vao vetivety monja
No nihaonantsika roa
Tiako ianao satria
Fitiavana mafonja
No mafy tao am-po

Tiako ianao na dia
Maro mpankahala
Sy mpisompatra ny dia
Tiako ianao satria
Ianao no mahalala
Ny halalin'ny fitia

Tiako ianao na dia
Be ny mpanaratsy
Mampiferin'aina
Tiako ianao satria
Rehefa atsy ho atsy
Ireo ho tonga saina.

Tiako ianao na dia
Gidragidra lava
No iarahana mizaka
Tiako ianao satria
Tsy maintsy mbola hisava
Tsy maintsy mbola hitraka

Tiako ianao na dia
Sembanina isanandro
Sakanan-tsy hanantena
Tiako ianao satria
Nivonona hitandro
Fitia nifanekena

Tiako ianao na dia
Natsipy tamin'ny tany
Lazaina fa tsy tsara
Tiako ianao satria
Ianao irery ihany
No raisiko ho anjara

Tiako ianao na dia
Totorana hakiviana
Isanandro izao
Tiako ianao satria
Tena tia sy tiana
Fa tsy mba milalao

Tiako ianao na dia
Lazaina fa adala
Satria miaraka amiko
Tiako ianao satria
Tsy misalasala
Amy teny mamiko

Tiako ianao na dia
Lazaina an-dranomaso
Fa diso tarigetra
Tiako ianao satria
Tsy misy andraso andraso
Ny "Eny"-nao rehetra

Tiako ianao na dia
Rahonana amin-teny
Mandratra fo indrisy
Tiako ianao satria
Ireny rehetra ireny
Ataonao toy ny tsisy

Tiako ianao na dia
Ny hany vavakao
Latsaina sy hamavoina
Tiako ianao satria
Ny heloka nataony
Tsy tananao intsony

Tiako ianao na dia
Tsy maintsy mbola hitohy
Irony adintsaina
Tiako ianao satria
Fotoana kely fohy
Dia ho avy ny maraina.

Via Lanciani Roma
18/10/2004
--------