Angaly (Tsiroa)

Ny hira dia manambara
reo rehetra izay nodiavina
toa mamerina tantara
sy manandro ilay ho tiavina

ny faniriana sy hetaheta
antsipirihiny, voambara
na manindrona aza anefa
arahin-tsioka avy ato afara

lay feo manga izay miangaly
no mampihiratra ny kalo
raha henoina toa mamaly
tonom-bavaky ny maro

raha arahim-peon'antsiva
mampanganohano maso
indrindra ny andro raha hariva
mampitamberina ny ankaso

raha tovanana valiha
dia mampihakatra lay sento
raha lavitra lay tia
toa any an-kafa fa tsy eto

raha arahin'ny kabosy
dia manentana ao anaty
mahatonga anao mamofy
tsirim-pitia mba hiantsampy

eh monorotoro fo
mamotsipotsitra reo fery
mampitraka ihany koa
raha mahatsiaro tena ho very

eny fandefasan-kafatra
raha lavitr'anda-kira
ahatsiarovan-tena ho sambatra
raha akaikin'olo-tiana
--------