Nandeha nitady (Tsiroa)

Nanantena ny hahita
ka nandao ny fihaviana
nihandrandra ny ho tafita
mba hahazo izay hiriana

Nifofotra, nikely aina
hahavita ny fianarana
ao aoriana mba tsy hangaina
ny ambony 'hany no tratrarina

Dia nahatozo zato izy
ka nandroso hatrany hatrany
Tsy mba sasatra na kivy
tany andafy no niafarany

Tsisy ngidy tsy nandramana
ahatonga lavidavitra
ny mpanana nalai-namana
amin'izay mba tena avotra

Dia nanohy fa tsy nijanona
mandra-vita ny ambony
misy aza ny nialona
nefa izany tsy nahoany

Dia tsy nijery tany aloha
fa ny ho avy zany ihany
Na ny havana ary toa
Tsy nojerena raha tomany

Dia nandroso izato taona
tonga saina fa irery
ireo vita zava-poana
tsisy olona mpijery

Antitra tsisy mpitodika
Tsisy ho avy ho jerena
Izy ihany no namotika
nohon'ny fitiava-tena


Monday,May 7, 2012
--------