Mionona (Vetso mena)

Ry foko mionona fa aza mitanondrika
Mahatsiaro ho voadona sy toa voakika
Tsy ho anao izy fa sendra mba miserana
Nefa noheverinao fa izy no honenana

Ry saiko mitonia, aza asiana alahelo
Ny nahitan'ny masoko azy vao teo
Niaraka tamin'iny lehilahy iray iny
Na dia mampatsiaro ny lasa sy ny fahiny.

Aleoko mionona irery fa tsy hitady mpampionona
Satria ny foko voadona ka mbola toa mivokona
Nialako moramora tao anaty ranomaso
Naleoko nisitaka, ka nakipiko ny maso

Aleoko mionona irery fa izay ny azy
Tapitra hatreo koa ireny vazivazy
Hitady vaovao aho hahasolo ny taloha
Mba hiova fitia vaovao,mendrika tokoa
--------