You are here: home > Vetso

RY HAIZIN-KITROKA INY... - Tara-masoandro

Ry haizin-kitroka iny, mpanaloka hazavana
Impiry moa ianao no resin'ny masoandro?
Ka ny andian-drahonao miparitaka aok'izany, sy mandositra tsy tana.
Ary indro dify ianao, dia loko fotsy indray no mandravaka ny andro.

Ry haizin-kitroka iny mpanaloka ny tany.
Toa tsy mba kivy ianao, fa tonga foana ihany?
Mandrakotra avy hatrany ilay taratry ny andro.
Ny andian-drahonao mitambatra ho iray, mba handemena indray ny herin'ny masoandro.

Ry haizin-kitroka iny, mpandravaka ny alina.
Hodianao tsy hita va, fa ny tsikin'ny masoandro dia ampy handrava anao?
Ary hampody ny maraina mamiratra sy lalina,
Izay hahajamba anao, handravarava anao.

Koa nahoana no misisika, mibahan-toeran-dava, ry Ingahy Rahaizin-kitroka?
Tsy tsinjonao moa va ilay taratra hazavana, izay tsy mba mety lefy fa mamiratra hatrany.
Ary izy no banjiniko, ny tavany sariaka no mandroaka, mampandositra ny rahomaintin-giroka.
Ka ho sasatra eo ianao, fa ny herin'ny masoandro dia tsy ho lany ritra,
Fa handravaka tontolo mba ho lasa paradisa.


Tara-masoandro
04/05/2019

Hevitra mandeha

hery (19/05/2019 23:10:23)

Tsy maintsy mandresy ny mazava

Tara-masoandro (20/05/2019 20:22:27)

Eny, tena izany mihitsy

Hametraka hevitra

Midira aloha