Mbola ilaina ve? (mpandalo)

Mbola ilaina ve ny ranomainty
Hametrahana tantara?
Sao dia efa manakaiky
Ny hiavian'ny anjara.

Mbola ilaina ve ny ventsoventso
Hanangonana tomany?
Sao dia efa atsy ho atsy
No handaozana ny tany.

Mbola ilaina ve ny disadisa
Hamoronana ahiahy?
Sao mba efa kely sisa
Dia ho rava ny tsiahy.

Mbola ilaina ve ny tambitamby
Hamerenana fitia?
Sao dia efa zary sangy
Tafahoatra, mampihemotra ny dia.

Mbola ilaina ve ny hiverenana
Amin'izay rehetra vita?
Sao hanjary hanenenana
Raha tsy ho tody ery am-pita.
--------