Mitia aho fa mankahala (NY HARIAINA)

MITIA AHO FA MANKAHALA


Indraindray aho mitia, dia tsy misy afa-tsy ianao
No andrianin´ity foko
Saingy rehefa injay reko mitambolona ao anatiko ao,
Mibosesika misoko
Tsapako ho mandrotika ny manontolo ny aiko
Mila ahalasa adala
Reko fa manolatra,mankarary koa ny saiko
Ny nataonao malala
Indro aho fa mankahala



Indraindray aho mankahala sady feno hatezerana,
Noho ny nataonao ahy
Reko fa mikiky ny hambom-poko indray miserana,
Mampiady ny fanahy
Saingy indro fa miverina mibanjina,mandinika ny eritro,
Ny tokatranontsika
Dia mibahana miverina mambabo ny eritreritro
Tsy tiako hangatsiaka,
Ireo mamy sy ireo fý
Indro aho fa mitia


Indraindray aho mitia dia toa ahy ery ny lanitra,
Satria aho anilanao
Ampoka fitiavana tsara mahafinaritra,
Noho izao rehetra izao.
Saingy indro fa miserana mamangy ny ati-foko,
Manaloka ahy mangiana
Mandrotika ahy tanteraka ary avy dia tsaroako,
Mila tsy atoriana
Ilay nataonao ahy malala
Indro aho fa mankahala


Indraindray aho mankahala satria dibok´halahelo,
Tsy mahatelin-kanina
Ny feonao miteny tsy mba ilay mamelovelo,
Fa mahavalalanina
Tampoka miverina mandalo ra-fahatsiarovana
Sy ny vokatra voahoty
Voatery aho mandresy ilay saika fadiranovana
Tsy akory aza niangoty,
Fa tena mankahia
Indro aho fa mitia

NY HARIAINA
3 desambra 2011
--------