Hihira (Ny Radontsoa Mamiratra)

Mihira ianao androany: Hira mitanisa
ny tsiky sy ny olatry ny lasanao rehetra;
Hira te-hidradra fa nisy paradisa
tanatin’ilay fo nirianao ho tomoetra …

Mihira ianao androany: Kalokalo manja
mirakitra ny tsantan’ny diary anatinao …
Ngadona sy rima mahay mandanjalanja
ireo korontan-drindran’izao tontolo izao.

Fa mbola hihira ianao: hira tsy mifetra,
Handevona ny ela nandrotika Fanahy ;
Hiran-kasambarana sy tsiky tafatoetra;
Hiran-teny mamy … Hirahira ho ahy!

Ny Radontsoa Mamiratra
12/05/2020
--------