VOADY (Rabarison Roberto Stephan)

VOADY

Fa na ony maro aza
Tsy hafaty ny afom-pitiavana
Sahiko eto ny milaza
Fa ho anao irery aho rahavako

Eto anatrehan'andriamanitra
Ny tany , ary ny tontolo
Fa tena vonona aho hiaritra
Ny amiko ho anao daholo

Tsy sanatria antendromolotra
Fa ny fo no efa miteny
Anjara ianao fa tsy hoe nantolotra
Ka ho tiaviko ombieny

Ity tonokaloko ity
Atolotro anao ho voady
Fa tiako ianao ary ho doria
Ka ho sasa-poana ireo papiady

Ny fitia anatiko ao
Latsa-paka mafy orina
Efa natokako ho anao
Ka tsy azon'iza ho fongorina

Matokisa ianao malala
Fa ireo teny izay nomeko
Dia milaza manambara
Fa ianao no efa nekeko

Rabarison Roberto Stephan ✍️
--------