Kalo (Rado)
(Nalaina tao amin'ny vetso.serasera.org)
Matoa mikalo aho izao hariva izao,ka mamboraka eto 'reo rakitro efa tao
Tsy kalo an-terisetra, tsy didy mahafanina
Fa alahelo anao : mivetso fa dia manina !
... Satriko hikalo mandavan'ito alina
hitondra ho anao ny nofinofy lalina
sy rindran-tononkira madio mangasohaso
mandrotsirotsy mora mampandripandry maso ...
Matoa aho mikalo, miritsoka mangina
mitendry ity valihako an-takariva sina
dia fantatro sahady, fa ho anao mihitsy
no namoronako azy, na tononkira vitsy ...
Lay eritreritrao izay fara-fiadanako
no baiko mampitendry ireto ratsan-tànako
'Lay masonao mitopy: homehy fijery izay
no manjary "naoty" tononiko eto indray ...
Ilay salovanao tadidiko firafitra
no elatra mitondra sy lakan-tsara rafitra
mamezivezy mora ny rivotra ho fikopany
hanaraka ny ngadony sy ny fitopatopany ...
Matoa aho mikalo, na ora fahanginana
izao hariva izao, dia ho fanamasinana
ny hirako rehetra s'ireto kalo entina
ho anao irery tsy hisy pentimpentina
Matoa aho mikalo tsy sasatra toy 'zao
ho fandrotsiana anao, ho fiderana anao
ry Ain'ny hetsi-poko, ry naman'ny fanahiko,
ry maha-sarobidy ny vetson'ny tsiahiko
... Matoa aho mikalo izao hariva izao
dia tiako hitafitafy ny varavaranao
hidiran'ito kalo hiraiko takariva
handrotsirotsy mora ... fa hitako madiva
ny torimasonao ... Sady sao mb'izao
no tànana mandrotsy sy hampatory anao ...
Dia akimpio ny maso, f'izaho hihira hatrany
handrotsirotsy anao ... Ka manofisa mamy !
1958
--------
Lien:
Commentaires
kinaoly
(
25/12/2003 02:42)
tsy hira ny hira raha tsy misy ny tonony, misaotra an'i Rado sy ireo nanisy feo sy nandrindra ny hira.
sariaka91
(
12/07/2004 13:19)
Vao zaza 7 taona aho no namaky ity tononkalo ity ary tena nambabo sy nanamarika ny hatanorako manontolo izy ity. Antaonany maro no tsy namakiako azy ity, sambany indray androany. Tsy miovaanefa fa mbola mampihetsi-po foana.
Misaotra Rado. Misaotra koa an'i Oully
Misaotra Rado. Misaotra koa an'i Oully
