Kisendrasendra (Rado)
(Nalaina tao amin'ny vetso.serasera.org)
Kisendrasendra, angamba, ilay isika nifanena ...Kisendrasendra koa 'lay topimasontsika ...
Kanefa tamin'iny, injao nangenahena
Ny fo amam-panahy sy ny fisainantsika ...
Matahotra ho tia.
Kisendrasendra, angamba, ilay teniko mangina
toa mila tsy ho re ... Kisendrasendra koa
ny nahatonga anao hamaly am-pifaliana
ny teny izay nataoko ... Kanjo tao am-po
Dia samy efa tia.
Kisendrasendra, angamba, ilay ianao natahotra
ka nandray ny tànako ho vahatra ifaharana ...
Kisendrasendra, angamba, izaho 'lay vahobahotra
namihina anao ... Nahita fahasambarana
f'izay vao tena tia.
Kisendrasendra, angamba, ilay ianao tsy tratrako
fa lasana nandeha ... Kisendrasendra mamy !
fa ny alahelom-poko, ny tsiaro feno fatrako
no nanambara tamiko, fa ianao no hany
Malalako doria ...
1965
--------
Lien:
Catégorie :
Fitiavana
Fans:
SamMakavela - mialiii - Vola Herilala - priscanantenaina07 - Vonjisoa-Andjanirina - rfanomezantoky - razafiafenitra - Masoandroko - RijaAndry - famoha - rangymiezaka93 - RaonyFitiavana - andreasr - nikopol - fafa - belay - booboo - kinaoly
Commentaires
osrabn
(
05/05/2005 16:50)
Marina tokoa fa feno kisendrasendra ny fiainana. Ny kisendrasendra tena mamy anefa dia ny kisendrasendram-pitiavana tahaka izay voalaza eto amin'ity tononkalon- dRado ity.
