Hifampizatra sa hifampanantena ? (raozigasy)

Toa lasa zatra lava izao, mandray ny soratananao,
Efa zatra mihitsy aza, mahazo teny avy aminao
Tena zatra , zatra foana, hoe hamaky anao indray
Za-dratsy aza moa ny farany, ka isan’andro dia maimay

Nozarinao ve moa no antony ? sa nampazatra tena koa ?
Sa nozarin-dRafahazarana ? ka tsy nampiasa loha sy fo ?

Manantena aho isan’andro, hoe hisy hafatrao ho tonga
Manantenantena lava, hoe hisy teny misomonga
Manantena foana foana, hoe nanoratra ianao
Ka ilay fanantenana mihaadala noho ianao

Nampanantenaina ve ? na nanantena fahatany ?
Sa moa ilay Ramanantena , no mampiandry anao izany ?

Tsy haiko intsony lahy izay marina, tsy hitako izay ambara
Fa isan’andro vaky izao, miandry anao hanohy tantara
Ka zatrazatra manantena, manantena fahazarana
Hoe ity soratsika ity, hitohy hatrany tsy hifarana
--------