Hofatorako (raozigasy)

Hofatorako ,hofeheziko amin’ny fahamatoran’ny fitia
Ny tantarantsika roa
Ka hifaningo-po sy saina, mandrakizay doria doria
Na amin’ny ratsy na amin’ny soa

Hogejaiko an-tambitamby, sy oro-mamy tsy ho lany
Izao fiarahantsika izao
Ka fatomatin’ny fitia, hifandalim-paka hatrany
No hamehy ahy sy ianao

Horojoiko tadin-defitra, sy fahalalahan-tsaina feno
Ny fiainantsika mianakavy
Ka fifankahazoam-panahy, sy fifanajana no hameno
Ny ampitsotsika rehetra ho avy

Hofenoiko tonombavaka, iarahana miventy
Izany hetaheta izany
Dia hangatahiko ny Avo, handrindra ka hanao izay mety
Raha toa sitrany izany
--------