Izaho hono tsotrabe (raozigasy)

Izaho hono tsotrabe, tsy mahay izay politika
Ka azo hoe fetsifetsena, amin’ireo fikafika
Diso hono ny fihevitro, raha toa manao kajy an-kandrina
Dia lazaina aho hoe mangina, sy hilamina hitandrina

Kanefa ange ilay fikajiko, matematika tsotsotra
Ireo vola izay nafafy natambatambatro an-jotra
Hoe raha toa ireo kandida, ka miisa telopolo
Dia ireo no ampitomboina, an-tapitrisa hoe am-polo

Mety angamba hoe ilay kajiko, no tena tsy mety tsara
Satria ny hofan-kopitera, mbola sandaina an-dolara
Ireo vorom-by madinika, mitetitety vazan-tany
Mbola mandoa saran-tsolika, fa tsy mandeha fahatany

Ireo fiara 4x4, miasa andro aman’alina
“Voyage” indray mandeha, dia aman’hetsy sy aman’alina
Raha izay no atambatambatra, atentim-bidy vola “euros”
Ho anay tsy mahay manisa, maro ihany ireo zero

Ireo vidina t-shirt, sy nanaovam- “banderole”
Ny karaman’ny boaikely, mihoga fa ny azy no “role”
Ireo mpametaka “affiche”, sy ireo hafa izay mpanongotra
Ireo akama izay mpanara-dia, manofa “bus”, mandeha an-tongotra

Ireo no natao adisanina, ary nampifanampiana
Ny valiny nivoaka teo, vokatra nahavariana
Teti-bolam-pirenena, mahavelona herintaona
Kajikajy mahakenda, mampiloa-bolana ny moana

Dia izaho moa ilay tsotrabe, dia mba nanontany tena
Manao ahoana raha ireo kandida , milaza hoe tia firenena
No manambatra ny heriny, ho an’I Madagasikara
Isika angamba ho tafavoaka, hivoatra hiaina tsaratsara
--------