Lasa hono Rasiza (raozigasy)

Lasa any an-drenivohitra hono akia Rasiza
misy havany hono any, tsy haiko aloha hoe iza

hay !!!! ilay zana-drahavaviny, nanambady be kamio
ilay nalaza be hoe nahazo « tonton »

hay ve iny e … haiko tsara, ilay sola sy behatoka
rehefa izy ilay miteny, somary mihatokatoka

tena izy indrindra, ilay bekibobe
fonentanentan'iny, miedina fandeha

dia haninona any, sa ve hiasa an-trano
mety hoe nitsoaka fotsiny, fa tena leo ny angano

…..

avia nareo Razane, izao indray ny vaovao
Rasiza ilay tsy re sy tsy hita tao ho ao
lasa any an-drenivohitra, tena nifindra monina
vita ny taty, ilay hanina tsikonina

ilay havany iny ange, tena misy atao
tena patabe, fa saingy tia lalao
Ity Rasiza ity, aza mety hivadihany
rehefa ela monina ambany valin-drihany

sady Rasiza ange, tena mba tsaratsara
ilay mifintina manify, tsy ilay be amboradara
aza hitako aza hitako, hoe nivadika « tonton »
amin'ilay firesany, vao miteny dia hoe « bon »

aleo izy akia ho any, mba miova ny fiainany
sady ndry koa ve tsy leo, isan'andro hitarainany
izao azony ilay tiany hoe leo atao tanavo
fa miova saranga hafa, hoe mba avoavo

izao izy miakatra latabatra fa tsy ambony tsihy
dia mba tsy plastika fa bakoly ny vilia
ny jirony « ampoule » vita izay ny « jabora »
pihana dia maty, fa tsy vonoina amin'ny rora

…..

eisy e Rasiza

izy izao any , efa manao « jean »
hitako eto mihitsy tena tahaky ny inona

hahaha dia ahoana izany izao, ilay tongobolo sy paraky
dia hanao « adidas » ve ilay tongo-bakivaky

dia ilay diloilo coco, asolony « creme »
dia ilay bononoka, hosoloiny « nem »

aleo akia izy ho any a, ndeha hanasa lamba
mena izay ny sofiny, amin'ny fosa angamba

ny antsika aty tohizana, ny fiainana milamina
aleo izy any re , mba hihaminkamina

© Raozigasy
--------