Neny a (raozigasy)

Fetin’ny reny hono amin’ny alahady izao
Dia tondraka indray ny mpivarobarotra,
Miaraka amin’ny doka sy loko mizahozaho
Amin’izay ny vola, mivoaka tsy mba sarotra

Fetin’ny reny hono amin’ny alahady izao
Dia zarina ny ankizy any am-pianarana
Hanao tsianjery, hiteny izao sy izao
Hanao fanomezana sy hajejo an-daharana

Fetin’ny reny hono amin’ny alahady izao,
Daty natao an-diary, manara-tonon’andro
Fa ny anay tsy toy izany, ny anay zanakao
Fetin’ny reny foana, isan’andro isan’andro

Ka ny teny mamy miloatra avy ao am-po
Ho lava andro ianao, hiaina lavi-drofy
Hiarahana miria, ho ambinin’ny Tsitoha
Hotanteraka aminao ireo nofinofy
--------