Ny rongoniko (raozigasy)

Ny rongoniko, ny toakako, ny jangako, ny lokako
nanontanianareo , ka indro re avoakako
raha toa saro-takarina, aleo re ho ahy irery
fa izay no mba tontoloko, raha mankany ianao dia very

…

ilay vovo-toto-potsin'ny alin-tsy nandriana
ilay boza-dafika kidoro, izay tsy natoriana
ilay tsindrona fanala, takim-bolin-tongotra
ilay sinton-tsento lasa, notrohina sao miongotra

izay no rongony fohako

ilay loha-maherin'ny vinany mitete
ilay botsiaka fotsin'ny ainga izay mandeha
ilay fàna tera-po, misonga dibo-doboka
ilay akom-berim-peon'ny ambiroa migoboka

izay no toaka inomako

ilay endri-kanton'ny hatsarana izay foronina
ilay sarim-boatram-bika, an-tsaina izay antonina
ilay fofona nanaitra, ny hanimbolo ho rendrika
ilay tsiky-jery raitra natambatra, narendrika,

izay no jangajangako

ilay tambin-tenin-dravaka, handrojoana tsofoka
ilay tovantovan-tovona, antsefa-mitsorofoka
ilay foron-tohin-teny, tsy taka-tsandam-bidy
ilay verindroam-pananterana, mampiady ireo safidy

izay no lokalokako

…

ka tsy haiko loatra re, raha toa ka nahavaly
ilay fanontaniana, napetrakao omaly
f'izay no azoko ambara, izay koa moa no marina
raha sarotra fantarina, an-tohatra takarina

Raozigasy
--------