Ny sezanao tsy maintsy OK (raozigasy)

Maninona moa i Raozigasy, raha milatsaka PM
raha natao ny kaonty mantsy, ny azy mbola be ny « j'aime »
raha atao ny fampitaha, amin'ireo depioté
izy mety handresy an'isa, raha an-kajy eto amin'ny FB

Dia hatsangany ho minisitra, « conseiller » sy SG
ireo akama rehetrarehetra, mizara sy mi- « partager »
na mahay na tsy mahay, rehefa hita hoe mi « tague »
dia tsy misy hambahamba, fa tonga dia atao DIRCAB

Zarainy ny ministera, ary ampitomboiny isa
foroniny ireo asa ts'isy, s'ireo toerana tsy voavisa
isaky ny « region », apetrany koa ny « antenne »
mba hahafahany mihaino ireo vahoaka izay mpimenona

Ataony matotra ny resaka, alaminy ny fizarana
samy manao izay « vous voulez » , tsy misy resaka lalàna
raha vao akama tsy miketrika, na tsy mampiasa ny « coco »
dia tonga dia odiany fanina, sao mitady hanao « zorro »

Dia ireto ary ny ministera, voasoratry ny vakiraoka
ampiarahana ao daholo, ary atao indray mandroaka
na minisitra io na koa staff, tonga dia kitrano an-trano
amin'izay ts'isy SAV, amin'ny CI ka ho angano

Atao minisitry ny serasera, ireo mpandoto rindrina am « pub »
ao amin'ny filazam-baovao, ireo mpizara ny « youtube »
omena ny raharaham-bahiny, ireo TOA tsy miteny gasy
minisitry ny fitsarana, ireo vava maro basibasy

Minisitry ny vehivavy, ireo belamaody sy ny tariny
minisitry ny fihamboana, ireo « photoshop » be amboariny
minisitry ny varo-boba, ireo mpivarotra fripy
minisitry ny zava-kanto, ireo mpitsinjaka an-tsilipy

Ministry ny hatanorana, ireo mpaka tahaka vazaha
ministry ny fampianarana, ireo « SMS kwely f ts kwa »
ministry ny zahan-tany, ireo anti-mola be fikoty
minisitry ny kolo-tsaina ireo jejojejo sy tsy maoty

Minisitry ny toe-karena, ireo mpampindram-bola marobe
minisitry ny fivavahana, ireo mpitondra teny mandehandeha
ministry ny ala-voly, ireo mpilalao « candy crush »
minisitry ny ati-tany, ireo menatra fa « malgache »

Ireo aloha no voatanisa, ekena hoe « brouillon »
fa mbola hitombo an-dalana eny, rehefa tonga ireo « don »
avy amin'ny mpanambola, sy mpamatsy iraisam-pirenena
fa mandefasa aloha CV, na « copier coller » aza ange ekena

Raha toa ianao ka mahatsapa, fa mahafeno ny fepetra,
na koa mila tranobe sy 4x4 etsetra
dia aza misalasala, mandefasa MP
dia ny anjarako aza adino, ny sezanao tsy maintsy OK

Raozigasy
--------