Raha izany ary no izy (raozigasy)

Ho an'ireo mpanjono sy ny namany tsy nisalasala namosa-kevitra

…

Raha izany ary no izy, andao hifaninana
samy hanjono isika, am-pilaminana
ianareo milaza, hoe ny jono tsy kamo
fa fialana voly, sy fialana hamohamo

Ianareo mitokanà, ary koa miavaha
na fintana gasy, na « moulinet » vazaha
dia samia ianareo manazava,
hoe diso ny ahy ilay zava-boalaza

Fa ny jononareo, sady lalao no harena
fialana voly, nefa mahavelon-tena
tsy raharahan'ny kamo, fa tena lahasa
na izay fandresen-dahatrareo eo.. asa !

…

dia izaho kosa indray hilaza etsy andaniny
hoe raha izay jono, tsy haiko izay maminy
tsy aleoko rey olona manao tononkalo
iny mahavita manjono mpandalo

izaho tsy miady kankana, hahabe mikiraoba
na hisotrosotro avy eo hidegaoba
fa maka tsy taitra taratasy sy penina
mametraka rima, dia afa-badenina

izaho tsy miala maraina, hisetra hatsiaka hahangoly
hitorombina am-potaka dia hoe miala voly
fa mandinika ny habaka, miandrandra ny lanitra
dia ireo ny aingam-panahy, fa manao salanitra

….

eny e … kanefa moa io samy manao izay tiany
izaho koa eto no toa mitady izay tsiny
fa aleo ajanoko eto ny fampitahana,
sao ahazoako fondro, raha sendra vavàna

fa samia isika manao izay mba maminy
samia manjono, samia masina an-taniny
fa ny ahy tsetsatsetsa tsy aritra ihany
no nahatonga ahy hiteny an'izany

dia izay ry zareo fa aleo aho handeha
ny ahy jono fanahy, fa tsy atao an « -tsachet »
ialako tsiny ho anareo, mpaka fia
fa ny ahy tononkalo, no hahazahoako fy

…

Izay ary no izy, f'aleo aho hanjono
tsy kankana ny ahy fa soloiko honohono
na koa indraindray, resabe an-kifono
na koa politika mahabe romoromo

Izay ary no izy, f'aleo aho hamintana
ho hitantsika eo izay tsara vintana
izaho ilay manjono amin'ny tononkalo,
sa ilay mpanjono, mandany adiny valo

Izay ary no izy, f'aleo aho hanarato
ireo mpanao « j'aime » hamenoako ny harato
ireo mpanao « comment » ataoko sodoka
lazaiko hoe teraka Ambatobevohoka
--------