Resa-be (raozigasy)

Ho setrin’ny « Rajakom-bazaha » sy « Nivadika hono Rakoto »

Tsy hoe avy any an-dafy ialahy
Dia tena olona “ca va”
Hidedaka miseho milay
Manaonao antsojay

Tsy hoe avy any am-pita akory
Dia tsy havan’izay ory
Mampiaka teny sy mikiaka
Manambany, manalika

Tsy hoe ialahy mitondra “euros”
Dia miebo hoe « heros »
Ka manambonimbony tena
Sy miangatra an-jerena

Tsy hoe ialahy minday “dollar”
Dia rehefa aty Gasikara
Mihevitra fa manan-kery
Ka misekoseko irery

Tsy hoe baoritra vazaha
Dia miainga tsy manahy
Ka avy dia mirafarafa
Manitsakitsaka ny hafa

Raha toa ialahy ange nahavita
Dia nilevena tany am-pita
Izao ilay hoe notapohany
Ka mihevitra azy ho lohany

Dia aza manao mampihomehy
F’efa lasa resa-be
Hoe hay ve ilay avy an-dafy
indray ilay miseho ho mafy
--------