tantarany (raozigasy)

Tantarany

Nantsoiny aho tamin’izay
Hoe misy resaka iray
Tiany hozaraina indray

Dia hoy izy tamiko
tiako ange sy mamiko
Ilay fitiavana nindramiko

Fa ny anay ka hafa
Na ny safo na ny tafa
Fitia tsy mampijafa

Fa ny anay ka tiako
Fa izay rehetra iriako
Tonga dia takiako

Fa ny anay fitia
Na halatra aza fy
Tena mamy ery

Fa ny anay ka zara
Tsy mba maramara
Hatrany am-parafara

Fa ny anay miavaka
Na dia tsy mifandravaka
Fa miafina an-davaka

Fa ny anay tontolo
Tena tsara kolo
Tsy misy izay bontolo

Fa ny anay voarara
Tsy azo ambarambara
Na dia tena tsara

Izaho mihaino ny tantarany
Ireo loatram-po fizarany
Tsy haiko izay fiafarany
 
Dia nangina kely
Nisento ilay anjely
Tsy nitraka toa voavely

Dia izay ilay noravaiko
Dia izay ilay nosimbaiko
Ka simba be ny saiko

Satria izy irery
Tsy nisy teritery
Malalaka fijery

Satria izy tokana
Dia tena nanompana
Ny fony ho ahy manokana

Kanefa izy tia
Naniry mafy ery
Ny hoe ho doria

Fa izaho no tsy naniry-
Hoe ilay fitia nitsiry
Hiaina anaty kiry

Ka ny hevitra mba hitako
Ny hafatra nampitako
Dia ilay fisintako

Sy fanolorana azy
Na dia am-bazivazy
Hafa ho mariazy

Dia nakombony ny vavany
Nitanondrika ny tavany
Maina ny fitazany

Izaho mihaino ny tantarany
No hany namaharany
F’izay hono no anjarany

…

Dia nihaona indray izahay
Dia hoy tamin’izay
Mbola ao ilay vay

Mbola ao ilay ratra
Fery diso fatra
Manindrona ny tratra

Mbola tsy mihidy
Na dia mangidihidy
Ilay foko voadidy

Mbola tsy voatsabo
Ilay fitia voababo
Ilay saina te hiabo

Mbola misy lavaka
Kely nefa miavaka
Mbola tsy voaravaka

Mbola misy fery
Mampiteny irery
Maha-te hiery

Mbola misy loaka
Tsy saron’ny safoaka
Maha-te hitsoaka

Mbola misy tsongo
Mahatonga maso bongo
Rehefa mivangongo

Izaho mibanjina azy
Manefa izato sazy
Mbola ho ela vao hivazy

Kanjo indro fa nidify
Ilay endrika niampify
Nitsiky ireto nify

Dia feo nahery setra
Nanaiky izato fetra
No nanarona ireo tsetra
Dia niteny koa ny fony
Hoe aleo fa hosoloiny
Izay fitia tsy hamony

Dia avy eo dia nihomehy
Kely indray mandeha
Vao tokelaka lehibe

Dia nijery ny tontolo
Dia namboatra volo
Dia nametaka ireo kolo

Dia nikakakaka
Hoe saika tsy nahazaka
Ilay zavatra namaka

Dia velom-bolo indray
Ilay namako izay
Efa saika fay

Dia nisaotra ahy nihaino
Ilay tantara feno
Nataony “aleveno”

Dia nidina ilay fiara
Nitsikitsiky tsara
Izany ka tantara …

Dia izaho ilay nihaino teo
Nahita azy an-tseho
Nanoratra avy eo
--------