Toy ny fary lava vany (raozigasy)

Toy ny fary lava vany, ny saotra averimberina
tsy mety lany mamy, satry foana anterina
Fa sitraka leireitsy, telina tokoa
Ireto fanohanana, mampihetsi-po

Toy ny fary lava vany, ny saotra tsy atsahatra
Atolotro anareo, maro mitandahatra
Manotrona, manitsy, ary mampahery
Mahatsiaro ity mpanoratra fa tsy miteny irery

Toy ny fary lava vany, ny saotra atohi-vakana
Zaraina ny mpamaky, tsy mihafa na miakana
Mitia sy mizara, ireto tonon-kanto
Ka isan-kerinandro, mitombo isa zato

Toy ny fary lava vany, ny saotra an-teny mamy
Zaraina sy omena, tsy mety an-tanan-dany
Vao maika miampy tobaka, tsy mba marisarisa
Mitombo isan’andro, k’izao valonjato isa
--------