TSIKY VENDRANA (raozigasy)

Ilay bitsi-teny izay natsipiko, tan-tsofinao izay nanongilana
Ilay pi-maso izay natorako, taminao tan-kodimirana,
Ilay vongan-tsiky feno lefaka, natorako tsy mba noferana
Ilay kopa-tanan-tsaro-kenatra, nomeko anao ilay niserana
Dia fihetsika ninia-natao, natera-betso te ho namana

Ilay vezika etsy sy eroa, akaikinao mitanintanina,
Ilay edim-pihetsiko narija, nangata-maso mihaminkamina
Ilay jery ranga feno jejo, maniry mafy ny ho hita
Ilay tsaingotsaingo-dresaka, fa manan-teny tiana hiampita
Dia fientanam-po niserana, ka tena sarotra sakanana
…

Kanjo, iny ianao fa tamy, tsy nisala fa nanantona
Ka nampivoara-mena ny endriko, ka hatramin’ny feoko nihantona
Ary dia ianao indray, no nampidi-dresaka sy tafa
Ka nangorana ny lohaliko, dia iny aho fa hafahafa

Dia kenda, tankina sy moana, sady tsy nahaloa-peo,
Toa te hirifatra hitsoaka, te hiantso hoe vonjeo
Tsy hita akory izay atao, rehefa tonga ny tokoa
Ka tsiky vendrana no sisa, arahin-tsafosafo loha

…
--------