Miverena an-doharano (RHHC)

Miverena an-doharano

Raha mahatsapa ho very an-dalana,
Miverena an-doharano,
Karohy, ataovy lohalaharana,
Ny maha-Sarobidy anao, fantaro!

Mila tony, kimpy maso,
Fantoka amin’ilay AINA,
Io, mandevona ny ankaso,
Ny Fiadanana? Zarainy.

Amin’izay ianao, hahatsapa,
Fa tsy ilàna olon-kafa
Nitondra drafitra vaovao
Mety handetika anao.

Fa efa misy anjara kanto,
Sady mendrika no tsara,
Narindra hilamina, hilanto,
Ka ny ao anaty no hanambara.

Anao anefa ny safidy,
Hatoky na hanova izany,
Malalaka, tsy misy didy,
Ny Mpahary moa hanefa hatrany.

Ho an’ireo tsy nahalala,
Dia sasa-miandry valim-bavaka,
Voafitaky ny tombo sy hala,
Ahetrin’ny hafa any an-davaka.

Eny, ekena, fa tsy mora,
Ny hampisinda rako-tava
Vonto lainga isan’ora,
Tena mafy ny mandrava.

Saingy aoka anefa hahatsiaro,
Fa ampy hery ireo maro
Efa manandratra ny hasina,
Manarin’izay nitsikasina.

Avo lenta ara-panahy ireo,
Mahita hiratra jerena,
Matoky feno an’Ilay Mpiahy,
Ny mizara soa, efa nekeny.

Izy ireo no efa manampy,
Eny amin’ny fiaraha-monina eny,
Mampatsiahy ‘lay Vatolampy
Ao anaty… tena harena.

Ao ‘Lay Loharanon-tsoa,
Mandray ny andon’ny Lanitra
Sy Tsiron’ny Tany, hatrany an-doha
Mipariaka sy maharitra.

Miantsa, indreo, ny zava-boahary,
Re ny akom-pifaliana,
Velon-tsaotra indray ny Tany,
Fa tandrify faniriana.

Miha-miverina haavo
Ireo lentam-pihasinana,
Ny mpanao tsindrio fa lavo,
Nihetry, resim-pahamarinana.

Ireo siokam-borokely,
Injao fa heno mitso-drano,
Manan-jina ilay teny:
Hoe “Miverena an-doharano”.

RHHC
--------