IO FITIAVANA IO IHANY (Teboka Telo)

Raha mbola tsy ary akory isika: tsy ary Idada, tsy ary Ineny,...
Dia efa voaventy tany ho any 'lay rindran-kalo, tsisy teny!
Nofonosin-drindrin-tafa teny an' habaky ny lanitra
'Lay zava-bita tsara indrindra, noforonin' Andriamanitra!

Ny horakoraky ny bitsiky ny tafatafa tsisy feo,
'Reo antsoantson-gina moana sy kalokalon' ny toreo
No fatotra mampifandray ny samy tsy hita nifangia,
Ka mampitambatr' olon-droa mba hifanaiky ho doria!

Dia mitsiry ny fitiavana sy mitrebona ao anaty!
Misamboaravaoara, te hitroatra; miredareda toa tsy ho faty
Fa ho velona ho nofo sy ho taranaka voaomana!

Fa any ho any, eto ho eto,... Eny, n' aiza n' aiza izany:
Tsy misy velona tsy miaina io fitiavana io hatrany!
Fa io no lalam-pahariana sady rindram-pahavelomana!
--------