Ny antsika roa ... (Pissoa)

Ny antsika roa,

Ho inontsika moa ny androany,
Na dia "fety" eran-tany,
Raha tsy tena avy ao am-po?

Sao hanjary seho ivelany
Ka hadera ny famelany,
Nefa tsy hitondra soa.

Ndeha hidola toy ny volana,
Hanalavidavitr'olana,
Dia hahafinaritra ny miaina?

Sa handeha hitango kintana,
Dia hitanisanisa vintana
Hahamirana ny saina?

Nefa ny "isanandrontsika",
Tsy mba ilay volana baliaka,
Fa ilay haizina sy jaly.

Isika samy mahafantatra,
Tsy hilana kintana hitaratra,
Fa tsy miova ilay "omaly".

Raha mbola misy ilay fitiavana,
Raha mbola manana finiavana,
Raha mbola vonona hiara-dia;

Ndao mba zavatra haharitra,
No iarahana mamaritra,
Mba hampivelatra fitia.

Ndao havily ny tantara,
Tsy iandrasantsika anjara,
Fa andraikitro io, andraikitrao.

Ndao ny antsika, Sombinaina,
Ny isanandro no hatsaraina:
"Isika roa" vaovao.

Ndao ATOMBOKA androany
Ny "fety" ho antsika roa.

Pissoa (14 Fevrier 2006)
--------