Ry Masoandroko (Pissoa)

Anio maraina aho, vao nifoha
Dia notsenain'ny taratrao;
Taratra efa teo taloha,
Taratrao vaovao.

Notoloranao hazavana
Hiatrika ny androany;
Ny haizaina te ho tamana,
Fa tonga ianao dia niala ihany.

Dia nampianao tsikitsiky
Hisedrako ny ankaso;
Raha sendra resy, kivikivy,
Miarina ihany, tsisy andraso.

Nitondranao hafanana
Hangetaheta fahombiazana;
Asesikao tsy hihanahana,
Fa hioty ny efa tazana.

...

Ny herin-tsaiko saika hatory,
Nofohazinao, ho tena velona;
Ny hetsi-po sy lonilony
Nodorana ka nandavenona.

...

Ka raha hidify ianao ny hariva,
Ho lavitra ahy, ry ilay johariko;
Dia ilay taratrao mihaiva,
No isaorako Ilay Mpahariko.

Ry masoandroko ...

Pissoa
--------