Aza tsiny (raozigasy)

Raha nangina sy nilamina ny fanahiko ka moana
Raha nidongy tsy nanoratra, satria tsy ampy ny fotoana
Raha tsy niloatra elaela izany hetaheta anatiko
Dia aza tsininao ry embona, raha be ny vetso tsy narantiko

Raha tsy henonao intsony, tao anaty vola-maro
Ireo lahateny izay fanaoko, Angolan-teny mifangaro
Raha tsy hitanao tazanina, ireo riman-teny mba fanoratro
Dia aza tsiny re sakaiza, fa be ireo zavatra tsy tohatro

Raha toa ka rivo-dritsoky ny teniko, sisa henonao niselona
Raha toa ka embon-diso lasa kalo, no hany izaho sisa velona
Dia aza disoinao re ry soratra, fa ny fotoana tsy nananako
Tsy nahafahako mihitsy, naneho ilay talenta mba fananako

Aza tsiny ry mpamaky, ireo rangom-pohy feno hetaheta
Aza fondro ry sakaiza, mpakafy ity poeta
Fa tsy lasa lavitra aho akory, fa voaterin’ny fiainana
Ka zary ilay fitadiavana no nironan’ny fisainana
--------