Ianao tsy ho irery (raozigasy)

Tsy haiko ny mamorona, ary koa mandahatra ny tantaranao
tsy haiko akory aza, ireo nofinofy, sy vina tiana atao
tsy haiko ny ampitso, tianao hizorana, ka tsy azoko soratana
tsy haiko ny tanjonao, hoe aiza no mitsinjo, aiza no mamantana

fa ny azoko atao, dia ny mitondra tsiky, handravandravaka azy
ampiana sangin-teny, sy lalao ireny dia laroina vazivazy
hanatsara loko, ny lala-nofinidy, tianao atrehina
hanaingo dia azy, amin'ny rotoroto, sy hazaka an-kamehina

fa ny haiko dia ny hoe : namana ianao, mpinamana isika
ka fihavana-mamy, sy fifanoloran-tanana, no teny tiako adika
raha toa ny tsikin-teniko, no manome aina kely, sy sombintsombin-kery
dia zaraiko amin'ny fo, aparitako am-pitiavana, amin'izay ianao tsy ho irery
--------