Misaotra anao nahavita (raozigasy)

Misaotra anao nahavita,
ry filohan’ny tetezamita

…

raha maty aho matesa rahavana
aleo isika aloha tsy ho mpihavana
fa samia miaro ny rambony
samia mizaka ny atambony

fa toa efa antomotra ihany
ity ilay faran’ny tany
ora sisan’izato tantarako
sy boraingina nifandaharako

ka aleoko lazaina ny marina
ny resaka re aza hitarina
fa tsy izaho no fototry ny afo
raha nidedaka may teo ny tafo

fa tao ny governemanta
nanery ireo vay mbola manta
fa izany hono no tokony hatao
amin’izao tetezamita izao

dia tao koa ny CST
fototra nampitete
ny efitra ho tratran’ny rano
ireo no tena fototr’angano

dia tao koa ireo miaramila
tsy azoko navilalila
fa nanaja ny sata sy zony
ka tsy azoko baikoina hono

ny CES sy HCC
ireo tena olon-dehibe
tsy ananako fahefana
fa tena tompon’ny lalàna

ny ahy moa izay kely mba vitako
no nentiko sy naparitako
ho an’ny Malagasy malala
ka izay no nahatonga ahy tsy hiala

fa hanohy ireo ezako manara-penitra
hevitra tsy temitemitra
fa efa voadiniko tsara
satria ho avin’ilay gasikara

ka raha nisy ny diso nitranga
ny tena moa tsy voatery ho manga
dia aoka lazaiko anareo
fa noho ireo olona rehetra ireo

fa izaho tena nanao izay mety
eran-tany aho efa nitety
Israely hatrany Roma
Nandehanako nitsaontsaona

Fa izaho efa niezaka mihitsy
Fa dia sendra ny be noho ny vitsy
Ka aza tsaraina ho diso
Na hoe olona efa masiso

Fa nandrindra fotsiny hoe ho tafita
Ity fiainana tetezamita
Ka isaory aho re ry vahoaka
Fa dia aza mifandroadroaka

…..

Dia iny indray izao Rabefihavanana
Fa dia hanolotra Tanana
Hilaza hoe misaotra nahavita
Ry filohan’ny tetezamita
--------