Noterena (raozigasy)

Noteren’ny alaheloko hanoratra aho androany
Sy hilazalaza koa ireo vesatr’embon’ny vinany
Ireo toloko mifangaro, tsy fahafahana manoatra
Ny fiainanao ry fireneko, kely sisa dia any an-koatra

Noteren’ny hanin-dava, rehefa maheno vaovao
Hoe mijaly hono ianao, fa atao izao sy izao
Velona sy mitsipozy, anaty rofy sy adin-tsaina
Tena henoko hatrany ilay feonao izay mitaraina

Noteren’ny tsiaro, sy ny fahiny fahazaza
F’ ireo fitovoana very tany , no nanaitra sy nilaza
Hoe ny ho avin’ny tanora, sy ny ampitsony ahoana ?
Mbola ho poti-dava ve , sa hatanorana feno saona ?

Noteren’ny foko aho, hivavaka ho an’ny firenena
Hiainany raha azo atao, hasambarana hay jerena
Dia ho tany tena sambatra , toy ilay ventesina an-kira
Ilay madagasikarantsika, ilay fireneko sisam-bira
--------