SOAVA DIA (raozigasy)

lay ranomaso nikoriana, moramora tan-takolako
De mbola endrika sy sarin'ilay fitiavana tsy folako

Ilay sento lalina nanaraka, namintinana ilay resaka
Dia mbola taratra sy alok'ilay foko izay nitresaka

Ilay endri-maloka nafenina, tanaty solomaso maizina
Dia mbola sarina fitia, resy sady vao nofaizina

Ilay hovi-peo nanao veloma, sy nametraka tso-drano
Dia mbola tsipi-panohizana, mbola te hanohy ny angano

Ireny fihetsika ireny,sy ny sisa sy ny sisa
No fitiavan-tsy voambara, tamin'ireo ilay tsy hita isa

Ireny ilay fo feno redy, May nodoran'ny fitia
Tsy hanozonako anao, fa dia veloma soava dia
--------