te hihaona fotsiny (raozigasy)

Ho setrin'ny tononkalon'i Tahirintsoa ary atolotra an'i Soarilala

Te hihaona fotsiny
Hiresaka mangina, ny fihetsika sy fomba
Tsy hiloa-peo akory, nefa hitsikombakomba
Ny maso hifampijery, anatin’ny fikipîny
Ny tanana hifanena, hifanalavitra ny kitiny

Te hihaona fotsiny
Handresy sy hampitresaka, ilay elam-pahanginana
Feno filaminana, an-trenam-pamikinana
Ka ny tsy naloaka, sy ny tsy nambara
Rehefa ela ny ela, indreo fa voazara

Te hihaona fotsiny
Hizara ny tsy tanty, tanaty fiandrasana
Sy hanakatom-pejy, ireo elanelan-dasana
Tsy nahafaha-nanoatra, noho ireo bahabahana
Ka manararaotra mafy, vao mba nahazo vahana

Te hihaona fotsiny
Avy eo mifampitafa, sy mifanatsafa
Rehefa afa-tsakana, ireo nampijafajafa
Sy nampiolomay, niaretana hatrizay
Tsy te hihaona fotsiny fa te hihaona indray
--------