Tokontany sovenira (raozigasy)

Ilay tokontanibe filalaovanay fahiny,
nolalovako tsinahy omaly hariva tamin’ny dimy
dia taitra kely aho sady zendana, nahita izato fiovana
fa ny telo ampahaefany, efa voavidin’ny karana

izay sisan-toerana nijanona, tambadik’ilay joalan-drindrina
fiainana mampahonena, teny ratsy feno rindrina
misy trano fisotroana,mitsipozy,mitsilopy
feno karazandrazan’olona, mivorivory an-tropy

eo anilany indray,lafi-baoritra milahatra
tohizan-gony varavarana, sy vezivezy tsy mitsahatra
fifandimbiasan-dehilahy,manakaiky retirety
sy tovovavy jefijefy, mihaona kely vetivety

izay manodidina rehetra, na ny tamboho, na amin’ny tany
feno lo, feno fimailo, feno diky, feno amany
ilay sisan-tokontany, zoro kely mba nazava
lasa toeram-pilokana, rarak’ompa sy taim-bava

dia nihorona ny lohako, nahita izato fiovana
izao izany sisa ve ? no niafaran’ilay tanàna
fierem-boto, firevena, fiainan-doto tsy madio
fivarinan’ireo resy, fihaonan’olona mijio

nefa teo ange fahiny, tokontanim-pahazazana
teo izahay no nilalao, nihosom-bovoka mazàna
teo izahay nanao zoera, nanositosika kodiarana
nanao fanenijka sy baolina, rehefa vita ny fianarana

nandraingy kely aho nandeha nody, nanaikitra ahy ity fiovana
fahaverezana mandotika, tankonan-drindrin’ny karana
karazam-piaina roa samihafa, sisa sary mba voakira
lovan-toeram-pilalaovan’ ilay “tokontany “ sovenira
--------