AIZA NY SEKOLIM-PITIAVANA? (AbouNusrayni)

AIZA NY SEKOLIM-PITIAVANA?
1
Efa ela izay aho no velom-panontaniana,
Raha mahita ireo tranga eny amin'ny manodidina.
Mamely mafy ny ankaso, ny alahelo, ny hakiviana;
Tena mitombo aok'izany ireo lavo, mitsingidina.

2
Manan-desona tokoa rh'ireo finoana rehetra;
Ny amin'izay tondrozotra mba tokony ho arahina.
Nefa ireo izay manaraka toa vitsy sy voafetra;
Ary betsaka amin'ny olona tsy mihaino sady pahina.

3
Fa maninona hatrizay no tsy mba misy ny finiavana;
Mba hampianatra an-tsekoly izany atao hoe tena miaina.
De ny rivotra mitsoka no mampianatra fitiavana…
Nefa ny miofana amin'izany sady tsara no ilaina?

4
Ny ambaratonga faharoa mba nasiana ilay taranja,
Hilazana ny fiasan'ireo taova-pananahana.
F'ilay tena zava-tsarotra izay miandry eny an-kianja,
Tsy misy mba manoro fa navela ho baranahana.

5
Ny asa sarotra rehetra dia nasiana fanofanana;
Ny dokotera, porofesera, saofera sy enjeniera.
Ka mahagaga ahy mihitsy ny tsy mba nanokanana;
Sekoly ho an'ireo tsy hanao mompera na masera.

6
Asa mankadiry izany hoe Dada na hoe Neny;
Tsy misy fanandramana fa mandra-pahafaty.
Ireo zava-tsy milamina rehetra hita ombieny;
Tsy misy antony hafa fa fianarana poakaty.

7
Ny tena fototry ny fiaiana tsy atoro any an-tsekoly;
Fa navela handeha ho azy amin-tele sy fesiboky.
Tsy mahagaga raha mandripak'izay tsy izy ny devoly;
Nohamoraintsika ho azy ny mangeja sy mambotry.

Zoky Abou Nusrayni
Filaozofy Poeta Mpampianan-tena
09_11_2019
--------