You are here: home > Vetso

HALAKO... - AbouNusrayni

Azo vakiana?

HALAKO…

Misy lohahevitra iray // Tsy itsitsiako fiteny ***
Satria afo mahamay  // Mandriparipaka ombieny

Misy namako tsy faly // Isaky ny ito mba tenenina
Nefa ny fiainana omaly // Zary lesona tsy afenina

Izaho koa tsy hitotaly // Tsy hataho-masomena
Be loatra ny mijaly // Lavon’ireo mpiaro tena

Toa izay rehetra aleha // Ahitana ny tarazony
Tsy misy mampireha // Ho an’ireo izay nalazony

Tsy manavaka saranga // Mandravarava ny taranaka
Toa tsy dia misy mpiampanga // Nefa fositra mihanaka

Tompon’antoka mpamotika *** // Izay mahavanona azy
Ho avy momoka sy rotika *** // No lova avelany, toa sazy

Mpamono sy mpamorika *** // No fitsarako ireny
Toa tsy folaka aforitra // Ny fitiavan-tenany, tsy ekeny

Ny fisarahana no ambarako // Fa tsy inona tsy akory
Tsy ireo mpisaraka no halako // F’izy tsy mba diso akory

Azo atao hoe samy afaka // Izay mbola tsy niteraka
Ny zaza anefa tsy rano raraka  // Ka ho andeha atao tandrevaka

N’inon’inona tsy zaka // Na ahoana dio tena
Ny sombin’aina tsy fandaka // Tsotr’izao tsy azo ekena…

Raha zaza no maditra // Vitan’ny kapoka sy anatra
Hoe miteraha mba hahita // Nefa izany akory tsy filamatra

Raha ny vady kosa no ariana // Nefa nandatsahan’anaka
Inona ankoatry ny habibiana // No anaovan-jaza toy ny fanaka?

Raha ianao hanampo-drano // Fitoeran-tsoliky ny fiara
Moa tsy mampiditra angano // Izato sainao maramara?

Toa izany koa ny zaza // Mitady solika ny ainy
Mila tohana sahaza // Avy amin-dreniny sy rainy

Misy banga misavoana // Raha tsy hita ny iray
Tsy hay totofatofam-poana // Na omena vola dia izay

Maro amin’ireny zaza ireny // No mivarina sy lavo
Hita mivaro-tena eny // Na mivadika tanavo

Ireo jiolahy ikoizana // Ireo sipa kely mamoafady
Aleo dia tena ho voizina // Fa zanaka mpisara-bady

Raha misy iray na roa // Hitanao fa mba tafarina
Tsy izany kosa aloha // No hahatankona ny marina