Volana (Bovalox)

Raha mbola izaho variana nitazatazana
Sodokam-bezivezy sy tabataba maro
No nanjelatra tampoka taty amiko ny volana
Ka zary toa tsy nisy ireo zava-mifangaro

Sodoka ery 'ty zaho nandinik'azy
Tsy haiko hazavaina ity tara-bolafotsy
Eh! Sambatra aho ry lahy,tena tsy vazivazy
Nianoka tanteraka sy voarotsirotsy

Hadinoko mihintsy nanomboka teo angeh eh;
Fa ny tongotro hay mijoro eto ambonin'ity tany
Tsy voazavam-pitenenana mihintsy ny hoe:
Hasambarana, hasambarana, tsy misy ohatr'izany!

Nitady sezakely ary aho mba hipetrahako,
Hangalàko fy sy hitsetsefako ny hakantony,
Arahi-mozika tsara rindra sy manako
Safononoka mijery ity hosodoko izay arantiny!

Fa tamin'izaho ilay variana be nitsentsitra,
No indro nihazakazaka ity rahona hafahafa
Taitra tampoka aho no sady lasa eritreritra
Hoe iza koa ity mpisompatra mamotika ny tafa ?

Sinimbany tanteraka sady tsy nampoiziko
Ity hasambarako nanenika ny atin'ny fanahy
Raha fantatro mialoha dia tsy novoiziko
Hanatona azy akaiky ny lakako ry lahy!

Tazaniko eto foana anie ianao isan-kariva eh,
Dia nieritreritra aho fa hoe mipetra-drery
Hay ilay silakao misioka mora toa antsiva
Avy any am-pitan-dranomasina mifono mistery !
--------