ALEO AHO HIJINJA - fanasina7

Azo vakiana?

Any ianao izay, tsy hita ho jinery,
Na dia mifanakaiky aza, dia mifanao fangala-piery
Noho ny hadalako miharo lakalakam-piainana.

Any ianao izay, mihafy sy miaritra :
Vono, latsa, eso…tsiny tsy voafaritra
Noho ny hetraketrako sy tsy fahampiam-pisainana.

Any ianao izay, migoka ny mangidy
Noho ny fitiavana ahy « safidy sarobidy » ;
Nefa izaho akory tsy mba azo nitarainana.

Ekeko ny hadisoako, k’aoka ho ahy ny tsiny.
Izaho no tena kentrina, nanao toetram-pivahiny.
Koa aza isaina intsony ho tompon’ny fonao ;
Koseho sy fafao…hanody ahy anie izay natao !

Vonona aho ny hizaka ny kapoky ny « Ambony »
Raha izay no hahatsara sy mety hampitony
Ny alahelo sy havinirana :
Satria sitrapo nanahirana !

Koa aleo aho hijinja izay nafafiko !

1999F7

Mombamomba

Mpanoratra : fanasina7

Nampiditra : fanasina7
Daty : 13/01/2014
Mpamangy : 877
Mankafy : 0

Tononkalo hafa

ILAY EKS-MALALA
HAHADIMBY ANARAN-DRENY
MANALA BARAKA VEHIVAVY
BYE BYE FA TSISY HEVITRA
ODY FITIA TENA MANDAITRA
NY ADIN'NY MPIVADY
KIFOSAM-PIALONANA
Modia ianao ry zanako
HANDEHA IANAO
FOIKO