Ny Tenindrazako - Jean NARIVONY

'Lay Teny, teny mamiko,
Dia ahy tsy nindramiko,
Nanaovana ny lelako
Ka ahy, tsy havelako.
'Lay teny sarobidiko
Mitana ny safidiko
Dia tolotry ny Lanitra,
Avy amin'Andriamanitra.

         Fiteny ahombiazako
         'Lay Teny soan'ny razako;
         Nandamina ny fiainako,
         Namboatra ny fisainako.
         Fa Teny firesahako
        Sy Teny fivavahako,
        Ka io no anatonako
        Ny Tompo fiononako.

Vao raisiko ny peniko
Dia indro fa ny Teniko
No avy hamborahako
Ny vetson'ny fanahiko.
Ny teny ho fitandroko
Manapitra ny androko,
Tsy miova ilay voalazako:
Ny Teny...Tenin-drazako.  

        Ny teny no fitandroko                                                                                                
        Manapitra ny androko,
        Tsy miova ilay voalazako:                                        
        Ny teny...Tenin-drazako.
        'Lay Teny mampitambatra
        Ho iray ny Nosy Sambatra
       Sy teny itenenany
       Ny FAHALEOVANTENANY.              

Mombamomba

Mpanoratra : Jean NARIVONY

Nampiditra : jdd.rakotozafy
Daty : 03/06/2016
Mpamangy : 5573
Mankafy : 6

Tononkalo hafa

ATO NO MANDRY
Ny tanantsika
Vonim-boahirana
Misy ady
Iny Ankaratra Iny
TEBITEBY
VONINKAZO
Naloan'ny fasana
RAJAKOM-BAZAHA
Ny tia sy ny manina