Takariva - Jean NARIVONY

Tazanina iry vodilanitra mavo,
Zay hany tratry ny masovoafetra,
Jerena Lavitra manjavozavo,
Ka ory ny saina, ny vava mitsetra.

Manidina irony tsiriry mihoatra,
Mamela veloma ombieny ombieny:
Ny tany hodiany tsy fantatra loatra,
Kanefa ny saiko dia Lasan'ireny !

Ny raho-madinika miara-misosa
Finaoky ny rivotra mamelovelo,
Manaitra ny fo ao anatiko kosa
Hamoaka ny sento fambara alahelo.

Ireo voronkely mamonjy fodiana
Dia samy mikalo ny hirany mamy:
Izahoko irery no be fahoriana,
Toa fendrofendroin'ity alina tamy.

Ny masoko revo mitazana ihany
Manitsy ilay toerana mbola hodiako,
Iarivo malala tsy roa aman-tany,
'Lay tany fonenan'ny olona tiako !

Tandrifin' ireo foto-kazo maniry,
Ambanin'ilay raho-mena miloko,
Ankoatr' iry dongona iray makadiry
No misy ilay Jerosaleman'ny foko !

larivo nilaozana nefa tsaroana
Ka dia mampanembona aty andakira,
No dia mampiloatra ny sentoko foana,
Dia sento mitambatra ho tonon-kira !

Mombamomba

Mpanoratra : Jean NARIVONY

Nampiditra : hery
Daty : 02/05/2022
Mpamangy : 308
Mankafy : 0

Tononkalo hafa

ATO NO MANDRY
Ny tanantsika
Vonim-boahirana
Misy ady
Iny Ankaratra Iny
TEBITEBY
Ny Tenindrazako
VONINKAZO
Naloan'ny fasana
RAJAKOM-BAZAHA