Ho anao ry tiako (Lahatra Natiora)

Ho anao ry tiako

Tononkalo iray niangaliako fatratra
No indro efa nomaniko, hatolotro ho anao
Ianao no nofinidiko handray izato hafatra
Ary koa handre izao teny mamy izao

Ny bitsiky ny foko manakoako anaty
No hery iray nanosika ahy hanoratra izao
Tsy azoko kobonina fandrao ka hahafaty
Ilay vetsoko mangina sy faniriana anao

Teny anankiroa, na koa litera folo
No entiko hilazana ny ato am-poko manontolo
Ilay teny "Tiako ianao" no avy dia ambarako
Hifampitantana amiko, handravaka ny lalako

Izaho izay manoratra, efa fantatrao angamba
Aza omena tsiny fa ny foko anie ka jamba e !
Potika tanteraka, lavon'ny fitia
Maniry mafy indrindra ny ho eo anilan-dry

Faniriana ny ahy, fikasana fotsiny
Ny fanapahan-kevitra ? Ianao no tena tompony
Ka andrasako milamina izay valin-teninao
Eny, am-pitoniana hatrany ! Fa tiako loatra ianao...

Lahatra Natiora
11/02/2021
--------