Sanatria (Lahatra Natiora)

Sanatria

Taloha aho tia anao fa tsy nasianao sarany
Eny, nambaniana sy tsy nasianao vidiny
Nionona ny foko fa efa hoe tsy anjarany
Tsy nierika azy akory ilay mba nofinidiny

Nampiononoko ny foko mba hilamina sy ho tony
Nampanginiko ihany koa ny fitiavako anao
Nampianariko ny saiko mba tsy ho tia anao intsony
Fa ndrao hanjary ratra sy fery vaovao

Ankehitriny kosa aho efa tojo ilay anjarako
Fa ny aminao rehetra efa adinoko daholo
Ilay tiako sy tia ahy no nantsoiko hoe malalako
Nanolorako ny foko sy ny saiko manontolo

Izao indray ianao,... nilaza hoe nanenina
Niteny ihany koa fa tena babo ankehitrio
Kanefa anie aho taloha ka nodianao be marenina
Izao ny ahy ny teniko sy tena tadidio, fa :

Sanatria dia sanatria raha izaho no mbola ho tia
Ilay fitiavako anao ange ka nahilikao fahiny e !
Voadona taty angaha ka niverina taty ??
Efa sambatra ny foko fa anilan'olon-tiany !

Lahatra Natiora
--------