Voadona (Nofy2)

Voadona ny foko, voadona ny azy
Raha samy nahafantatra fa hay vazivazy
Natao kilalao fa tsy mandrakizay
Raha samy nilaza ny tsirairay


Dia hoy izy tamiko toa nisalasala
“izaho nge tsy vonona fa nanadala
Nataoko avokoa izay azoko atao
Nentiko mba hanjonoana anao
Ianao moa dia rendrika ery ny amin’ny teniko
Kanefa dia tetika ireo izay nafeniko
Ka ialako tsiny amin’ireo zava-bita
Aleo dia misaraka tsy misy fanditra”


Dia hoy izaho taminy somary nitsiky
“misaotra nitsotra an’ireo zava-nisy
Izaho tsy akory tsy hoe tena tia
Fa mba fanandramana ihany ny aty
Mahatazana ny hafa mitantana ny azy
Mahita azy ireo mifanambitamby
Dia nanaiky anao fa mba te hahatsapa
Hay noheverinao fa fitia latsa-paka”


Tsy nisy nahateny, variana sy gaga
Samy nahatsapa fa hay mbola zaza
Na dia hita izao fa fitia sangisangy
Voadona ny foko, voadona ny azy

Nofy2
22 Nov 2011
--------