Ampindramo elatra (Ny Radontsoa Mamiratra)

Ampindramo elatra aho hoentiko hanakatra
‘reo nofinofy mamy niery ny fisiako ;
Hoentiko hanarina ny foko tafalatsaka
an-davaka mangitsoky ny fery ijaliako …

Ampindramo elatra aho, hoentiko hitety
ny habakaba-mangan’ny fiainam-pifaliana,
Fa ts’isy antra loatra ny orana nisesy :
namonto ny efi-trano nataoko fitodiana !

Ampindramo elatra aho ry vorona eny ambony a !
Hoentiko hanaraka ny sidin’ny tsy foiko …
Ho dila ny fitiavany ka tsy ho reny intsony
itony rediredy sy kalo hoventsoiko !

Ampindramo elatra aho, sao hisoka ihany
irý volana katsahiko fihinina ho ahy ;
Hoentiko hiakatra, sao sendra any ho any
no misy hasambarana sy fitoniam-panahy !

2020
--------