FITENY MAMY FAHINY - Petakasoa
Azo vakiana?
FITENY MAMY FAHINY
Aleo very tsikalakalam-bola
Toy izay very tsikalakalam-pihavanana
FITENY noraisina ho fahagola sy tola
Tsy ampiasaina intsony, nofohanana
Fa ny vola izao hono no maha-rangahy
Tsy mikonty intsony ny Fanahy
Izay nolazaina fa maha-olona
Ka ny manana miavona, miolonolona
Trano atsimo sy avaratra
Izay tsy mahalen-kialofana
FITENY tsy hita intsony taratra
Eo amin’ny fiaraha-monina
Fa dia toa ranon’Ikopa
Ny fiainan’olona rehefa misosa
Ka tonga namana vao mavomavo
Nefa dia samy voaharin’Ny Avo
Manaova soroka miara-milanja
Ary tongotra miara-mamindra
FITENY fahiny nahazo lanja
Saingy ankehitriny hafa no ahindra
“Tiavo ny tenanao, mifalia avanja”
Fa izany no tsara indrindra
Hanehoana ny maha-ambony saranga
Sy ny fananana fiaina-mirindra
Indrisy ry Taranaka taty aoriana
Nahoana ireo FITENY MAMY ireo no nariana?
Tsarovy fa "Ny firaisan-kina no hery,
Ka izay misaraka very "
Mivadibadika ange ny fiainana
Ny fahafaham-ponao anio
Ampitso mety ho fitarainana
Ka ny fanao tsy mety ahitsio
PETAKASOA (faha-07 jona 2010)
Hametraka hevitra
Midira alohaMombamomba
Mpanoratra : Petakasoa
Nampiditra : petakasoa
Daty : 07/06/2010
Mpamangy : 1291
Mankafy : 0
Tononkalo hafa
NY FOKO VE NO ...HAFATRA
HAY VE
Hafatra Paska
Tompo ô! ataonay ahoana
NOFINOFY
Ianao no anjarako
HERISETRA
MALAGASY AHO, MALAGASY IANAO
NY ZANAKA sy ny RAIAMANDRENY
