Any an-tanindrazako any (Pissoa)

Any an-tanindrazako any !


Misy hiaka sy talaho hampitsahatra ny ady,
Misy fo midradradradra, "Miverena, Fihavanana !"
Nefa misy koa ny hambo mampihenjana ny tady
Sy fitiavana harena, hampitombo ny eo an-tanana.

Misy zaza izao kamboty, ka ny hoaviny voafia ;
Misy hatanorana koa, mandry am-parafara vato !
Misy reny resim-basy, maritioran'amboa dia ;
Misy ray mba sahy nitraka ka ny fiainany naato.

Any an-tanindrazako any, firifiry no misaona ?
Saingy izao ny fahoriany toa tandrimo filalao.
Any an-tanindrazako any, ny fahendrena endrey mimoana,
Sangy ratsin-jiolahy no manjaka hatramin'izao.

Rahoviana no hangina ny hiakam-pitiavan-tena ?
Rahoviana no hisy handre ireo vahoaka mitomany ?
Rahoviana vao hikatsaka ny tombotsoam-pirenana
Ireo nasondrotry ny vola, any an-tanindrazako any ?
--------