Iny Zanako Iny (Pissoa)

Iny Zanako iny.

Tanora loatra izy iny dia lasana sahady ;
Zaza mbola tsy nandady !
Mbola tsy nandramany ilay fombako nibada
Nihanta tamin'i Dada ;
Mbola tsy hainy akory izany hoe miteny
Na miantso an'i Neny.

Mbola tanora hoy aho, tsy mbola nitomany !
Tsy mba nahita akory ilay mazava ety an-tany.

Iny Zanako iny.

Efa noheverin'ity fiainako adalo
Fa ahy tsy atakalo !
Efa nandrandrain'ny amiko tontolo
Fa hotiaviko bontolo,
Ka na hanao ahoana ny onjan'ny fiainana
Dia ho azy no isainana.

Eny, mbola tsy hitako, fa efa tiako hoy aho !
Tiako tao anatin'irony haizina nitraho.

Iny Zanako iny.

Pissoa
--------