Ry Volana (Pissoa)

Ry Volanay nazava,
Dia resy lahy ianao ...
Resy anaty haizina ho mandrakizay ;
Haizina tsy hisava
Fa na inona atao,
Ianao efa an'ny fasana fa tsy natao ho anay !

Ry Volana fenomanana,
Efa ny tantaranao
No sisa hitamberina anaty resak'olona !
Misy koa ny havanana,
Manitatra tsotra izao
Ka tsy ianao fa "sary" no tena voatonona.

Ry Volanay tomaratra,
Indrisy ny aloky ny fasana
No indro misalovana ilay taratrao mavany !
Izay ampahan-taratra
Sisa mba tsy lasana
Tsy laitra fa mivimbina sento sy tomany.

Ry Volana nibaliaka
Izany rehetra izany
No ezahinay hafenina amin'izay rehetra atao
Fa endrika sariaka
Sy tsikitsiky hatrany
No tianay hisedrana ity tany tsisy anao.

Ry Volanay nidify ...



Pissoa

30 Jolay 2007
--------